Hitamet á íslenskum veðurstöðvum 1924-2007

Trausti Jónsson 10.7.2007

Taflan hér að neðan sýnir hæsta hita sem mælst hefur á íslenskum veðurstöðvum frá janúar 1924 og fram á sumar 2007, bæði mönnuðum og sjálfvirkum. Listinn nær yfir þann tíma sem hámörkin eru aðgengileg í stafrænum gagnagrunni Veðurstofunnar. Eldri athuganir eru til frá fáeinum stöðvum, en hámarksathuganir voru gerðar mjög óvíða fyrir þennan tíma. Taflan er endurskoðuð útgáfa af lista sem birtist í greinargerðinni Hitabylgjur og hlýir dagar (pdf 1,1 Mb) sem aðgengileg er á síðu yfir útgáfu Veðurstofunnar. Frekari athugasemdir og skýringar á dálkaheitum er að finna í texta undir töflunni. Á nokkrum stöðvum eru fleiri en eitt jafnhátt hágildi.

Smellið á bókstaf til að skoða stöð sem byrjar á viðkomandi staf:
A Á B C D E É F G H I Í J K L M N O Ó P Q R S T U Ú V W X Y Z Þ Æ Ö

* í upphafsdálki þýðir að stöðin hefur ekki verið starfrækt samfellt.

Hæsti hiti sem mælst hefur á Akureyri er 29,9 stig í mikilli hitabylgju 1911. Í sömu hitabylgju mældist hiti á Seyðisfirði 28,9 stig sem einnig er hæsta tala fyrir þann stað. Ekki er víst að þessar tölur séu sambærilegar síðari hámörkum á þessum stöðum því fyrirkomulag mælinga og uppsetning mælitækja var með nokkuð öðrum hætti en nú er. Í áðurnefndri greinargerð er fjallað um nokkrar háar tölur sem vafasamar þykja.

Fyrsti dálkurinn í töflunni sýnir nafn stöðvarinnar, þeir tveir næstu hámarkshita stöðvarinnar og hvaða ár það mældist. Síðan kemur upphafsár stöðvarinnar, hér ber að athuga að taflan nær ekki lengra aftur en til 1924 og hámarksmælingar hófust ekki alltaf um leið og stöð var stofnsett. Hafi stöðin verið lögð niður kemur það ártal fram í næstsíðasta dálknum, en # ef hún er enn starfandi. Síðasti dálkurinn er innra númer stöðvarinnar (fyrir starfsmenn Veðurstofunnar).

Rétt er að benda á að sumar sjálfvirku mælingarnar hafa ekki verið ítarlega yfirfarnar og villuleiðréttar og of há gildi kunna því að leynast á stöku stöð. Fáeinar tölur á mönnuðum stöðvum eru grunsamlegar og má í því sambandi nefna tölurnar við Eyrarbakka, Lambavatn og Vík í Mýrdal. Þær eru þó látnar standa.

Óhjákvæmilegt er að listi sem þessi verði í sífelldri endurskoðun, breytingar á metum mönnuðu stöðvanna eru þó venjulega ekki miklar frá ári til árs. Margar stöðvar, sérstaklega þær sjálfvirku, eru nánast nýjar og má búast við að met þeirra falli nokkuð ört fyrstu árin. Listinn er því eingöngu heimild um ástandið á miðju ári 2007. Reynt verður að endurnýja listann að loknu sumri og einnig verður það gert ef mikla hitabylgju gerir fyrir þann tíma.

Sjá einnig Hitamet á íslenskum veðurstöðvum 1873-1923.