Tíðarfar í desember 2007

- stutt yfirlit

4.1.2008

Tíðarfar í desember var hlýtt, úrkomusamt og rysjótt. Meðalhiti í Reykjavík var 1,3 stig og er það 1,5 stigum ofan meðallags. Á Akureyri var meðalhitinn 0,8 stig, 2,6 stigum ofan meðallags. Meðalhiti á Höfn í Hornafirði var 2,1 stig og -4,3 stig á Hveravöllum (2,0 stigum yfir meðallagi).

Úrkoma í Reykjavík mældist 196,5 mm og hefur ekki áður mælst meiri í desember, þetta er meir en tvöfalt meðalmagn mánaðarins. Úrkoma á Akureyri mældist 60 mm og er það 13% umfram meðallag. Á Höfn í Hornafirði mældist úrkoman 234 mm og er það nærri tvöföld meðalúrkoma.

Þrátt fyrir þessa miklu úrkomu var ekki um met að ræða nema á fáum stöðvum, fyrir utan Reykjavík á þremur öðrum stöðvum sem mælt hafa í meir en 40 ár. Það er Andakílsárvirkjun (mælt frá 1950), Stykkishólmur (mælt frá 1856) og Mjólkárvirkjun (mælt frá 1959). Í Stykkishólmi má segja að um jöfnun mets sé að ræða því úrkoma í desember 1953 mældist 170,0 mm, en 170,8 mm nú.

Sólskinsstundir í Reykjavík voru 11 og er það í meðallagi. Ekkert sólskin mældist á Akureyri eins og venjulegast er í desember.

Stormasamt var í mánuðinum, einkum um vesturhelming landsins. Mælikvarða má sjá á línuritinu. Snjólétt var víðast hvar á landinu.

Illviðradagar í desember 2007

Mynd 1. Ilviðri í desember 2007. Línuritið sýnir hversu margar stöðvar af heildarfjölda voru með mest 10-mínútna vind síðastliðinnar klukkustundar yfir 17 m/s (hvassviðri eða meira). Í mánuðinum voru sex tilvik þegar hlutfallið fór yfir 40% í nokkrar klukkustundir í senn. Stormurinn þann 30. var útbreiddastur, síðan komu stormarnir 14., aðfaranótt 13., stormurinn á nýársnótt (telst reyndar formlega með janúar), aðfaranótt 11. og aðfaranótt 18. desember.