Landbreytingar í Suðurlandsskjálftunum 2008
Suðurlandsskjálftinn 29. maí síðastliðinn olli talsverðum landbreytingum eins og sést á meðfylgjandi mynd.
Veðurstofa Íslands rekur kerfi samfelldra GPS landmælinga til eftirlits og rannsókna með jarðskorpuhreyfingum í samvinnu við innnlendar og erlendar stofnanir.
Staðsetningar þessara mæla á Suðurlandi eru sýndar með rauðum þríhyrningum og láréttar færslur á þeim í skjálftunum með svörtum örvum.
Mestu færslurnar urðu á mælum við Selfoss (um 20 cm til SA) og við Hveragerði (um 17 cm til NV). Auk þess lyftist stöðin við Selfoss upp um 5 cm og stöðin við Hveragerði lyftist upp um 3,5 cm og eru þessar landbreytingar varanlegar.
Þessar hreyfingar eru í samræmi við hægrihandar sniðgengishreyfingar á sprungunum sem ganga annars vegar eftir Ingólfsfjalli og hins vegar frá Eyrarbakka norður fyrir Hveragerði (Krosssprungan).
Jarðvísindastofnun Háskóla Íslands, í samstarfi við Veðurstofuna, Landmælingar Íslands, Verkfræðistofu Suðurlands og Landsvirkjun, vinnur nú að því að kortleggja útbreiðslu aflögunarinnar betur með GPS mælingum á fastmerkjum.
Fylgjast má með daglegum niðurstöðum úr GPS kerfinu á vefnum.
