Tíðarfar í janúar 2025
Stutt yfirlit
Janúar var tiltölulega kaldur, sérstaklega á Norðausturlandi. Mánuðurinn var hægviðrasamur miðað við árstíma. Hlýindi og miklar rigningar um miðjan mánuð ollu miklum leysingum og flæddu ár og lækir víða yfir vegi og tún. Töluverð snjóþyngsli voru á Austurlandi í mánuðinum. Þar snjóaði óvenjumikið þ. 20. og mældist snjódýptin á Austfjörðum með því mesta sem vitað er um í janúarmánuði. Síðasta dag mánaðarins skall stormur á landinu sem olli bæði fok- og vatnstjóni, auk ofanflóða og mikilla samgöngutruflana.
Hiti
Meðalhiti janúarmánaðar í Reykjavík mældist -0,4 stig. Það er 1,0 stigi undir meðallagi 1991 til 2020 og 0,4 stigum undir meðallagi undanfarins áratugar. Á Akureyri mældist meðalhiti mánaðarins 3,0 stig sem er 2,5 stigum undir meðallagi janúarmánaða áranna1991 til 2020 og 1,9 stigum undir meðallagi síðustu tíu ára. Í Stykkishólmi mældist meðalhitinn -0,4 stig og -0,5 stig á Höfn í Hornafirði. Meðalhita og vik frá fleiri stöðvum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2015-2024 °C |
| Reykjavík | -0,4 | -1,0 | 82 til 83 | 155 | -0,4 |
| Stykkishólmur | -0,4 | -0,6 | 70 | 180 | -0,2 |
| Bolungarvík | -0,5 | -0,3 | 58 | 128 | 0,0 |
| Grímsey | -0,9 | -1,4 | 80 | 152 | -1,2 |
| Akureyri | -3,0 | -2,5 | 104 til 105 | 145 | -1,9 |
| Egilsstaðir | -3,3 | -2,4 | 55 | 71 | -2,0 |
| Dalatangi | 0,3 | -1,4 | 58 til 59 | 88 | -1,3 |
| Teigarhorn | -0,4 | -1,4 | 95 | 153 | -1,1 |
| Höfn í Hornaf. | -0,5 | -1,2 | |||
| Stórhöfði | 1,6 | -0,7 | 77 | 149 | -0,3 |
| Hveravellir | -5,7 | -0,6 | 30 | 61 | 0,2 |
| Árnes | -2,3 | -1,4 | 82 | 146 | -0,8 |
Tafla 1: Meðalhiti og vik (°C) í janúar 2025.
Tiltölulega kalt var um allt land í janúar nema vestast á landinu þar sem meðalhitinn var nærri meðallagi undanfarins áratugar. Að tiltölu var kaldast á Suðurlandsundirlendinu, Austfjörðum og inn til landsins á Norðausturlandi (sjá mynd 1). Í mánuðinum sem leið mældist lægsti meðalhiti janúarmánaðar sem mælst hefur á öldinni á þónokkrum veðurstöðvum í norðausturfjórðungi landsins. Jákvætt hitavik miðað við síðustu tíu ár var mest 0,5 stig á Skarðsheiði en neikvætt hitavik var mest -2,0 stig að Torfum í Eyjafirði.
Mynd 1: Hitavik (°C) sjálfvirkra stöðva í janúar miðað við síðustu tíu ár (2015 til 2024).
Meðalhiti mánaðarins var hæstur 2,8 stig í Surtsey. Lægstur mældist meðalhitinn -7,9 stig í Sandbúðum. Lægsti meðalhiti í byggð mældist -5,7 stig á Grímsstöðum á Fjöllum.
Yfirlit yfir landsmeðalhita hvers dags janúarmánaðar miðað við síðustu tíu ár má sjá á mynd 2. Þar sést að kalt var í upphafi og lok mánaðar en hlýindakafli var fyrir og um miðjan mánuð.
Mynd 2: Landsmeðalhiti hvers dags það sem af er ári 2025, miðað við síðustu tíu ár (2015 til 2024).
Hæsti hiti mánaðarins mældist 15,6 stig á Dalatanga (þ.14.) og Kvískerjum (þ.13.). Lægstur mældist hitinn -25,9 stig þ. 30. í Möðrudal. Lægsti hiti mánaðarins í byggð mældist -25,8 stig á Þingvöllum þ. 9.
Úrkoma
Úrkoma í Reykjavík mældist 107,9 mm í janúar sem er 25% umfram meðalúrkomu áranna 1991 til 2020. Á Akureyri mældist úrkoman 73,6 mm sem er 20% umfram meðalúrkomu áranna 1991 til 2020. Í Stykkishólmi mældist úrkoman í janúar 69,2 mm og 171,0 mm á Höfn í Hornafirði.
Dagar þegar úrkoma mældist 1,0 mm eða meiri í Reykjavík voru 13, sem er 2 færri en í meðalári. Á Akureyri mældist úrkoma 1,0 mm eða meiri 11 daga, eða jafn margir og í meðalári.
Um miðjan mánuð hlýnaði og rigndi talsvert, sem olli miklum leysingum á Suðurlandi, Norðurlandi og Vesturlandi. Ár og lækir flæddu víða vel yfir bakka sína, m.a. yfir vegi og tún.
Snjór
Alhvítir dagar í Reykjavík voru 19 í janúar, eða 7 fleiri en að meðaltali árin 1991 til 2020. Á Akureyri voru 26 alhvítir dagar í mánuðinum, 4 fleiri en í meðalári.
Mánuðurinn var snjóþungur á Austurlandi. Á Dalatanga voru 27 alhvítir dagar í janúar, sem er 14 fleiri en í meðalári. Alhvítir dagar hafa ekki verið svo margir á Dalatanga í janúarmánuði síðan 1993.
Það snjóaði óvenjulega mikið á Austurlandi þ. 20. Rýmt var vegna snjóflóðahættu á Seyðisfirði og í Neskaupstað. Nokkur meðalstór snjóflóð féllu, sem ógnuðu ekki byggð.
Snjódýptin mældist mest 90 cm á Dalatanga að morgni þess 20. Það er mesta snjódýpt sem mælst hefur í janúarmánuði frá því að snjódýptarmælingar hófust þar árið 1966. Einnig mældist snjódýptin óvenjulega mikil í Neskaupsstað (85 cm) og á Hánefsstöðum í Seyðisfirði (74 cm).
Sólskinsstundafjöldi
Í Reykjavík mældist 37,1 sólskinsstund í mánuðinum sem er 14,6 stundum yfir meðallagi áranna 1991 til 2020. Á Akureyri mældust 4,8 sólskinsstundir, eða 1,7 færri sólskinsstundir en að meðallagi í janúar árin 1991 til 2020.
Vindur
Janúar var hægviðrasamur um allt land og á nokkrum veðurstöðvum var meðalvindur sá lægsti sem mælst hefur í janúar á öldinni. Vindur á landsvísu var 1,2 m/s undir meðallagi janúarmánaða 1991 til 2020. Hvassast var þ. 15. (sunnanátt), þ.18. – 19. (austnorðaustanátt) og þ. 31. (suðaustanátt).
Stormur í lok mánaðar olli talsverðum samgöngutruflunum, foktjóni og ofanflóðum. Mikið álag var á fráveitukerfum á höfuðborgarsvæðinu og víða var mikill vatnselgur á götum úti.
Loftþrýstingur
Meðalloftþrýstingur mánaðarins var að hár um allt land miðað við meðaltal annarra janúarmánaða aldarinnar. Í Reykjavík mældist meðalloftþrýstingurinn 1003,2 hPa sem er 5,9 hPa yfir meðallagi 1991 til 2020.
Hæsti loftþrýstingur mánaðarins mældist 1031,5 hPa í Húsafelli þ. 1. Lægstur mældist loftþrýstingurinn 968,0 hPa í Stykkishólmi þ. 23.
Skjöl fyrir janúar
Meðalhiti á sjálfvirkum veðurstöðvum í janúar 2025 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.
