Tíðarfar í október 2024
Stutt yfirlit
Október var kaldur á landinu öllu. Það var kaldast á norðurhluta landsins en hlýrra sunnanlands. Tíð var þó nokkuð hagstæð, það var óvenjulega hægviðrasamt og úrkoma var undir meðallagi víðast hvar.
Hiti
Meðalhiti í Reykjavík í október var 3,3 stig. Það er 1,5 stigum undir meðallagi áranna 1991 til 2020 en 2,2 stigum undir meðallagi síðustu tíu ára. Á Akureyri var meðalhitinn 0,8 stig sem er 2,7 stigum undir meðallagi áranna 1991 til 2020 en 3,2 stigum undir meðallagi síðustu tíu ára. Þetta var kaldasti októbermánuður á Akureyri síðan 1981. Í Stykkishólmi var meðalhiti mánaðarins 2,7 stig og 4,1 stig á Höfn í Hornafirði.
Meðalhita og vik frá fleiri stöðum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2014-2023 °C |
| Reykjavík | 3,3 | -1,5 | 119 | 154 | -2,2 |
| Stykkishólmur | 2,7 | -1,7 | 143 | 179 | -2,5 |
| Bolungarvík | 1,7 | -2,0 | 113 | 127 | -2,9 |
| Grímsey | 1,5 | -2,3 | 130 | 151 | -3,2 |
| Akureyri | 0,8 | -2,7 | 128 | 144 | -3,2 |
| Egilsstaðir | 2,1 | -1,6 | 57 til 58 | 70 | -2,2 |
| Dalatangi | 3,9 | -1,2 | 73 | 87 | -2,0 |
| Teigarhorn | 3,7 | -1,3 | 114 | 152 | -1,8 |
| Höfn í Hornaf. | 4,1 | -1,7 | |||
| Stórhöfði | 4,7 | -0,8 | 94 | 148 | -1,3 |
| Hveravellir | -2,5 | -1,9 | 49 til 50 | 60 | -2,6 |
| Árnes | 2,2 | -1,7 | 110 | 145 | -2,2 |
Meðalhiti og vik (°C) í október 2024
Október var kaldur og hiti var vel undir meðallagi á landinu öllu. Að tiltölu var kaldara á norðurhluta landsins en eitthvað hlýrra sunnanlands. Neikvætt hitavik miðað við síðustu tíu ár var mest -3,5 stig á Hornbjargsvita, en minnst -1,2 stig í Surtsey.
Hitavik (°C) sjálfvirkra stöðva í október miðað við síðustu tíu ár (2014 til 2023).
Meðalhiti mánaðarins var hæstur í Surtsey, 5,8 stig. Lægstur var hann á Þverfjalli -3,9 stig. Í byggð var meðalhitinn lægstur í Svartárkoti -1,7 stig.
Hæsti hiti mánaðarins mældist 14,2 stig í Skaftafelli þ. 18. Mest frost í mánuðinum mældist -19,1 stig í Möðrudal þ. 13.
Úrkoma
Úrkoma í Reykjavík mældist 72,4 mm sem er 90% af meðalúrkomu áranna 1991 til 2020. Á Akureyri mældist úrkoman 44,7 mm sem er 60% af meðalúrkomu áranna 1991 til 2020. Í Stykkishólmi mældist úrkoman í október 78,4 mm og 140,0 mm á Höfn í Hornafirði.
Dagar þegar úrkoma mældist 1,0 mm eða meiri í Reykjavík voru 13, sem eru jafn margir og í meðalári. Á Akureyri mældist úrkoma 1,0 mm eða meiri 9 daga sem er tveimur færri en í meðalári.
Snjór
Jörð var alauð alla morgna í Reykjavík nema tvo daga þegar það var flekkótt. Alhvítir dagar á Akureyri voru 8, sem er fimm fleiri en að meðaltali 1991 til 2020.
Sólskinsstundafjöldi
Sólskinsstundir mánaðarins mældust 115,3 í Reykjavík, sem er 23,7 stundum yfir meðallagi áranna 1991 til 2020. Sólskinsstundafjöldi mánaðarins í Reykjavík raðast í 13. sæti á lista 112 ára. Á Akureyri mældust sólskinsstundir októbermánaðar 56,6 sem er 8,7 stundum undir meðallagi.
Vindur
Október hægviðrasamur um allt land. Lægsti meðalvindur októbermánaðar þessarar aldar mældist á þónokkrum veðurstöðvum.
Vindur á landsvísu var 0,8 m/s undir meðallagi októbermánaða árin 1991 til 2020. Hvassast var dagana 18. (austnorðaustanátt) til 19. (sunnanátt) og þ. 25. (sunnanátt).
Loftþrýstingur
Loftþrýstingur var undir meðallagi víðast hvar. Meðalloftþrýstingur í Reykjavík mældist 1002,6 hPa sem er 1,7 hPa undir meðallagi októbermánaða 1991 til 2020.
Hæsti loftþrýstingur mánaðarins mældist 1028,4 hPa þ. 6. í Grímsey. Lægstur mældist loftþrýstingurinn 950,0 hPa í Vestmannaeyjabæ þ. 18.
Fyrstu tíu mánuðir ársins
Meðalhiti fyrstu tíu mánaða ársins var 5,0 stig í Reykjavík. Það er 0,8 stigum undir meðallagi áranna 1991 til 2020 og 1,0 stigi undir meðallagi undanfarins áratugar. Meðalhiti mánaðanna tíu raðast í 87. til 88. hlýjasta sæti á lista 154 ára í Reykjavík. Á Akureyri mældist meðalhiti janúar til október 4,0 stig sem er 1,0 stigi undir meðallagi 1991 til 2020 og 1,4 stigum undir meðallagi síðustu tíu ára. Meðalhitinn á Akureyri raðast í 87. til 89. hlýjasta sæti á lista 144 ára. Fyrstu tíu mánuðir ársins hafa ekki verið eins kaldir í tæp 30 ár, hvorki í Reykjavík (kaldara 1995) né á Akureyri (kaldara 1998).
Það sem af er ári hefur úrkoma í Reykjavík mælst 660,7 mm. Það eru um 95% af meðalúrkomu áranna 1991 til 2020. Á Akureyri hafa mælst 494,4 mm. Það er um 14% umfram meðallag áranna 1991 til 2020.
Skjöl fyrir október
Meðalhiti á sjálfvirkum veðurstöðvum í október 2024
(textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.
